Søvnen
tek tak om to kvikke augo.
Den pratande munnen
blir stille.
Medvitet seglar
inn i si eiga underlege verd,
og let ein aktiv liten kropp få kvile.
Pusten finn sin jamne rytme.
Den varme handa,
som har halde fast i mi,
slepper taket.
Det er natt for Levi!
"Den grøne votten" heng på ein gran i skogen i kveld.
Den reiser si eiga reis i draumelandet.
"Eg er trygg hjå deg"
lagrar seg tillitsfult i barnehjarta.
Bestemor
kunne gått i stova no
men ho set og ser og ser.
Det er fred over eit nysovna barn.
Ein fred som skal fylla opp bestemorshjarta
til neste gong.
Gud signe desse skattane mine!
Ingen kommentarer:
Legg inn en kommentar