Eg forstår det ikkje...

Eg forstår rett og slett ikkje kva stortingsfleirtalet tenkjer når dei om nokre få dagar klubbar gjennom ei lov som seier ja til dei vaksne sine rettar, og nei til borna sine. Eg skjønar det ikkje.

Statsministeren seier den nye ekteskapslova er eit ja til kjærleiken.....

Det gjer meg vondt å vita at den lova Ap, SV, SP, Høgre og Venstre vedtek 11. juni vil gje rett til å skapa born utan far. Slik blir det, i si glede over å gje homofile same rettar som hetrofile så aksepterer det same fleirtalet at det kan skapast born som skal veksa opp utan å vita kvar dei kjem i frå og utan rett til å vita kven som er far deira, kvar halve identiteten deira kjem i frå!
Eg vert ulukkeleg på desse borna sine vegne, og eg er redd vi ikkje skjønar konsekvensen av kva dette fører til av identitetsproblem for desse borna. Andre vaksne sin kjærleik og omsorg kan ganske sikkert vega opp for ein del av dette tapet, men det kan aldri dekka over dei mange djuptgripande og grunnleggjande spørsmål eit barn og ein ungdom stiller - kven er eg? kvar kjem eg i frå? kvar høyrer eg til?

Med opne augo - eller kanskje heller med tildekka augo - pålegg samfunnet norske born slike byrder - eg skjønar det ikkje og det gjer vondt å tenkja på det.
Borna er det viktigaste vi har, utan born stoppar livet! Men born skal ikkje produserast for å dekka våre vaksne behov, det minste borna må kunna krevja av oss vaksne er at dei får vita kven dei er. Takk til Laila Dåvøy og alle andre i KrF som har prøvd å kjempa mot denne lova. Eg har fått vera nær mange av dykk og merka kampen og engasjementet dykkar. Det ser diverre ut for at vi taper kampen i denne omgang men vi kan ikkje gje oss - ein gong må folket vårt vakna og sjå kva som skjer med borna våre.

Fantastiske masfjordingar!

Eg er så full av takk ! Masfjordingar er eit heilt spesielt folkeslag, det viste dei oss på nytt i gårkveld.

Her har dei måtta "slite" med ein prest og familien hans i 25 år, og så møter dei oss slik på 25-årsdagen!

Tårer og kjensler tok overhand. Takk, og ei inderleg kjensle av å vera glad i folket, kyrkjelydane og kommunen fylte heile meg då eg kom til kyrkja i solskinnet i går kveld.

Kyrkjebakken fyltes av musikkantar, musikk og Sørsidefolk- frå ferja som la til land kl 18.40 strøymde det folk frå Nordbygda og Indrefjorden, Knut som hadde vore "kidnappa" heile dagen av sine flotte medarbeidarar, kom inn kyrkjeporten med eit ansiktsuttrykk som eg såg det budde mykje i. Der vart han møtt med feiande musikk, møtt av forventningsfulle born som hadde del i ein stor hemmelighet, foreldre som kom med kakefata sine og gode klemmar, eldre med faste handtrykk og venlege blikk...

Det var stort!
Og så - når dei første inntrykka ute var under kontroll, gjekk vi inn i ei kyrkje som også vart full av folk, musikk, song, og ord! At vi så kunne avslutta med kyrkjekaffi i ute på kyrkjebakken i vakker kveldsol, gjorde opplevinga fullkomen. Sjå også denne lenka

Eg trur dei som hadde teke initiativet til dette gjorde det for å gle oss, og dei lukkast! Eg kjenner eg framleis skjelv litt i bringa når eg set her og skriv dagen derpå.

Tusen takk for ei flott oppleving!

Burma

Tragedien, eller rettare sagt tragediane i Burma er ufattelege!

- 100 000 menneske har omkome under syklonen

- 1,5 mill vil døy neste veke vert det meldt
- Tusenvis er utan heim, mat og medisinar
- Styresmaktene hindrar hjelp

- I husarrest med avblåst tak og utan straum set fredsprisvinnar Aung San Suu Kyi og kan ikkje hjelpa folket sitt

- I Norge er det vakre maidagar, snart er det den 17.

- Fridom, fred og demokrati kan feirast

- Du underlege og urettferdige verd

Det gjekk bra

Marit og eg var på Flesland på KrF-rådsmøte i går, ei flott samling og vi reiste inspirerte heimatt. Marit hadde ordet etter partileiar Høybråten sin tale. Ho valde då å ta opp spørsmål om landbrukspolitikk og matproduksjon, og i gruppemøte om programarbeid seinare på dagen var det vedlikehald og sikring av vegar som var hennar tema. Jordnære og viktige saker for ein distriktspolitikar som Marit.
Så skjer det - på vegen heimatt at bilen hennar vert ramma av ras i Romarheimsdalen på E 39. Bilen vart overstrødd med jord og stein, og som ved eit under kom ho seg uskadd frå det heile. Alle som ser biletet skjønar at dette var nære på. Vegen har vore stengd i over eit døgn no, og dette skapar utfordringar for helgetrafikken. Det får så vera, det viktigaste er at Marit er heil og uskadd, og det skal bli godt når denne farlege strekninga snart vert erstatta med tunnel - det er på høg tid!

Arven

Eg hadde ein strålande dag i Gulen på mandag. Vakker natur, vår over alt, flotte menneske å vera saman med, rett og slett ein god arbeidsdag. Eg måtte sei til sjefen at eg er heldig som har ein jobb der eg får slike arbeidsdagar.

Mange ting gjorde inntrykk, tusenårsstaden f eks. Det å få litt meir kunnskap om vår historie, vår første "grunnlov" og om demokrati og rettsstat, gav meg eit nytt perspektiv. Underleg å sjå opningsorda frå Gulatingslova i lys av den dagsaktuelle debatten i Norge, litt spesielt var det også å køyra rundt med den politikaren i Norge som kanskje mest av alle denne våren har kjempa for, og lukkast med å vidareføra arven frå Gulatingslova der det står:
"Det er opphavet til lovene våre at vi skal bøya oss mot aust og be til den heilage Krist om godt år og fred og om at vi kan halda landet vårt busett og landsherren vår heil. Han er vår ven, og vi er hans, og Gud er ven til alle"

I vår vart alle partia på Stortinger einige om at § 2 i Grunnlova skal lyda:

"Verdigrundlaget forbliver vaar kristne og humanistiske Arv. Denne Grundlov skal sikre Demokrati, Retsstat og Menneskerettigheder."

Dette er vidareføring av arven frå Gulen !
og ingen skal fortelja med noko anna enn at dette vart eit resultat pga solid politisk innsats frå KrF sin Dagfinn Høybråten !

Å koma til Skjerjehamn denne flotte dagen var nesten som eit eventyr! Eg vart både rørt og fengsla av denne mektige statuen av vår kjære kong Olav. Opp mot ein knallblå himmel, med handa løfta over oss og med med blikket utover havet, sto han der og helsa oss! Det var flott, og hadde han kunna trur eg han ville lagt den store handa si på skuldra til Dagfinn som ei takk for innsatsen hans for å ta vare på den kristne arven frå Gulen. Kong Olav var ein konge som sette desse verdiane høgt!

Til slutt - det var kjekt å vera saman med ordførar Trude. Du er ein god representant for kommunen din og eg ønskjer deg lukke til med alle dine små og store oppgåver og utfordringar!

Betre enn venta

I dag er eg positivt overraska, meldinga om at kyrkje/statdrøftingane langt på veg har blitt forma i tråd med KrF sitt landsmøtevedtak, er det all grunn til å vera nøgd med. Må sei at dette hadde eg nesten ikkje våga å venta, og det er all grunn tilå gratulera både regjering og oppososjon. Her har det verkeleg blitt jobba, og både verdiparagraf med kristen forankring i grunnlova, og at kyrkja sjølv skal få utnemna både prostar og bispar, er ein siger.

Sjølvsagt er det dei som meiner dette er for svakt, eg undrar med litt over Espen Ottesen i NLM som snakkar om "pest eller kolera." Slike folk skjønar neppe heilt det farvatnet politikarar må manøvera i i slike saker. Heller ikkje skjønar eg meg på Lundteigen og Sp som seier at det ikkje er grunn til nokon endring.

Sjølv om det ideelle hadde vore ei fri folkekyrkje, så var det så langt vi kom denne gongen. Eg tilstår at det vert spanande å sjå kva slags føringar staten vil leggja for demokratiutvikling vidare, det kjem nok fleire kampar. Dei skal vi ta, men i dag gler eg meg over viktige sigrarer vunne, og eg tek hatten av meg for Dagrunn Eriksen og Dagfinn Høybråten - eg er rett og slett stolt over dykk! Dette hadde ikkje blitt slik utan dykk!

Tuba på Skjæret

Eg ønskjer meg ein tuba på Skjæret, på Skjæret på Sandnes! Ein kjempetuba full av musikk. Eg vil sittja inni tubaen, kikka ut på sjøen og fjella gjennom ein ventil og lytta til vakker brassmusikk, Frode sine tubasoloar og Odin sine trompetkonsertar. Eg vil lytta til aspiantane sine julesongar og eta karamellane deira...Eg vil lytta til koralar og marsjar, la sjela kvila og løfta seg gjennom Sandnesmusikk!
Tullar eg ? Nei dette er faktisk eit seriøst Kari-innspel i bygdeutviklingsdebatten på Sandnes.
"Vi vil ha opplevingssenter på Skjæret" vart det sagt på bygdemøtet. Her er mitt bidrag- la oss få ein kjempetuba med musikkoppleving i på Skjæret. Ingen andre har det.
"Kva er spesielt på Sandnes"vart det spurt på møtet."Lyset, himmelen, fjella, sjøen" vart det sagt. Eg seier ja til det, og gjennom tubaen på Skjæret skal vi skapa opplevingar av lys,himmel, sjø og musikk!!
Eksklusivt - eller kva??